929

身為『拉打』fans，都無咩理由唔睇系列最新作『仮面ライダー THE NEXT』！

承接上集『仮面ライダー THE FIRST』既良好傳統，今集各『拉打』造型比起上一集更加有型。心想理所當然會係新主角『V3』最型。但睇完後發覺三大主角比較起上黎，一號係造型上亦見心思及討好。為左要配合故事﹝連場激戰關係﹞，導致頭盔嚴重舊化。而落色亦比較起『THE FIRST』時暗淡。

故事方面，最想唔到既地方就係全片拍得異常黑暗。電影開首十幾分鐘，直頭好似睇緊日式恐怖片『午夜凶鈴』。故事中段部份鏡頭都有驚嚇位。先不理『拉打』果part，當係恐怖片睇亦無誇大。

除左恐怖位之外，全片評價就真係不知所謂。好多情節亦無交代，例如女學生『菊間琴美』見到自己老師『本鄉猛』變身大戰shocker後，對於變身以及shocker 等等毫不感到好奇？另外，『V3』風見志郎 和其妹妹出事後﹝改造人測試大屠殺後﹞，點解唔去搵下個妹？要到本鄉猛佢地搵到佢，先後知後覺去主動搵個妹？另一方面， 一文字既『換血問題』睇黎惡化左好多。咁呢兩年佢又點過呢？

好明顯將太多元素放埋一齊真係唔掂。故事中既平民以及fans 不斷遭受shocker 以及『鬼魂？』殺害，觀眾﹝包括我﹞睇起上黎真係幾混亂。導演究竟想將『仮面ライダー THE NEXT』定位為恐怖片？動作片？英雄片？特真係佢自己先知。

另外，一心以為『V3』會係中心主角既朋友就真係會幾失望。何解？風見志郎要去到差不多中段先出場。所以其實故事依然係以『本鄉猛』為主角。無奈今集敵人攻擊力大幅上升，導致一號由出場比人打到結尾…..

不過，動作場面都算係拍得唔錯。幾幕飛車場面拍得幾有心思，部份『拉打vs shocker 』及尾場大戰亦拍得不過不失啦。

其實上次睇完『仮面ライダー THE FIRST』，其愛情元素以及『回憶現實兩者交替式』拍攝手法可以話係好壞參半。估唔到今次睇完『仮面ライダー THE NEXT』之後，直頭怨氣衝天…….