以前港片抄西片就聽得多，估唔到十幾年後西片都會抄番港片。其實出黎既效果好唔好就真係見仁見智，不過睇過幾套抄港片既電影好似『無間道風雲 The departed』等就認真麻麻。今次就講講另一套『重拍』電影─ 『異度見鬼 The Eye』。

theeye.jpg

『異度見鬼 』係重拍番『彭氏兄弟』成名作『見鬼 The Eye』。基本故事係一樣，都係講女主角接受眼角膜移植手術後所遇到既怪事。如果有睇過『見鬼』既話都知道晒成個故事會點去，連個ending都一樣。

重拍既作品，都好難免比人拎黎同原作比較。如果講驚嚇度，『見鬼』會比『異度見鬼 』更強。兩者既分別在於『見鬼』恐怖既地方係由音響同氣氛去陪養出黎，而『異度見鬼 』則依靠突然而黎既鏡頭去嚇你一跳。自己雖然係恐怖片fans，但記得當年係戲院睇『見鬼』就真係幾驚嚇。另外，有時畫面照搬但無左適當音響都係制唔到個效果。好似『異度見鬼 』升降機見鬼果幕就係一個眼高手低既好例子。

無疑『異度見鬼 』係有幾幕拍得幾驚嚇，但論不安以及恐怖就真係『見鬼』優勝。個人覺得雖然係重拍之作，但其實ending 方面都可以修改一下。唔洗真係跟到完全一樣。對於未睇過原版『見鬼』既觀眾，『異度見鬼 』都ok既。