929

估唔到十幾年後，都仲有機會睇到『福音戰士 Evangelion』既最新作 『福音戰士新劇場版：序 Evangelion: 1.0 You Are (Not) Alone』。

呢期都幾多戲想睇。好似 奇洛李維斯既『 夜行悍探 Street Kings』、幪面超人THE NEX、Rambo 熱血回歸、三國之見龍卸甲等等。而係橫風橫雨既星期六，自己就選擇左去睇『福音戰士新劇場版：序 Evangelion: 1.0 You Are (Not) Alone』。唔係太多戲院上，不過好在旺角新世紀有得做。而入坐率黎講都算高，睇緊果時全院氣氛亦唔錯。

今次『福音戰士新劇場版』預計總共會有4部。而第一部『序 Evangelion: 1.0 You Are (Not) Alone』，則包括tv 版既第一至六集。由初戰使徒至到島屋作戰，98 分鐘可以話係全無泠場。尾場『島屋作戰』更加係全片高潮所在。雖然已經知道劇情發展，但睇番都好緊張。新版『第六使徒』變型一幕更加係迫力十足！

畫面方面當然係全新制作，而六集既剪輯工作亦算十分好。主角碇シンジ既內心戲雖然係大幅減少，但反而令到故事更流暢。相信就算係之前未接觸過Evangelion 既朋友，都唔算太難明白。

今集主線黎講都算係無咩點改過，但睇完預告後估計下集應該都會開始多番d新元素。期待中編『福音戰士新劇場版：破』同埋 惣流.アスカ.ラングレー登場！

滿分之作，點可以唔入戲院睇。有興趣睇既朋友記住睇埋片尾credits 後既預告片。

睇唔到既朋友都可以等月尾發售既 dvd 版。