929

究竟 Monster Hunter portable 2『MHP2』 同urban legends 有咩關係？就襯住Monster Hunter portable 2G 未出既同時，講番一d關於MHP2 廣泛流傳既urban legends.

咩叫 urban legends？urban legends 中文為『都市傳說』。其解釋引自wiki 【都會傳奇（又常稱為都市傳說）是一種民間故事，通過口語、傳媒和電子郵件等媒體無止盡地流傳下去。大家常常會將某個故事說成是發生在「朋友的朋友」身上。】好似我之前某個post 講番N年前，街霸1 可以拎鑰匙之後去非洲就一個經典例子。

今次會講幾個關於 mhp2 既傳說，第一個就係『摸豬有運行』事件。相信好多獵人都會係出戰之時同隻豬玩下先既。同隻豬玩有咩好處？據聞同佢玩『俗稱摸豬』完後，會為獵人帶黎好運。例如得到既道具會好d 等等，功用就等同『激運』。

經本人上網多番查證後，其實同隻豬玩係唔會影響獲取報酬既機率。亦無所謂『激運』既功能。摸豬其實只不過係比玩家練燒肉用既。講真如果『摸豬』有運行既話就唔洗有『激運』啦。

另一個廣泛流傳既事件就係『老山龍早死之迷』。好多玩家都相信係一輪強攻之下，無論係『老山龍』定係『蒼老山』未到『五區』都可能已經慘死。而小弟前幾日bbq時亦有同戰友討論過呢個傳聞。

為左証實呢個傳聞，小弟就裝左個睇血外掛。最後發覺其實無論你攻擊輸出有幾大都好，『老山龍』五區之前只會扣血扣到 1000 到﹝條龍總共有26666血量﹞。佢到 1000血後你點打都好，條龍都唔會再扣血。

最後一個講既就係『高台屈霸龍』。有傳聞指出係打霸龍果到有個高台，弓手可以上去屈射霸龍。經証實後，係打霸龍既地方的確係有個『高台』。但此地係正常既情形下根本唔會去到。要去呢個所謂既『高台』就要用一d 非常手法。

睇下MHP2G 出左之前又會有d咩 urban legends，暫時講住咁多先。