929

瘋癲『神探』一角由杜琪峰愛將劉青雲所扮演。故事方面講述『神探』因有某種能耐可以睇到別人心魔【故事指為鬼】，因而破案無數。但亦都因為佢瘋癲既行為令佢提早退休。原本過緊平靜既生活，直至另一年青幹探安志杰上門要求佢出山幫忙……..

故事結構黎講唔算係有咩大驚喜既位，基本上睇到一半到已經知道兇手係邊個。全片有趣既地方就係睇下『神探』點去查案。本片大主題係【每個人心裡都有鬼】。片中我地可以睇到『神探』一路上都睇到人地心中既鬼。到最後其實佢自己又有無鬼呢？

好多人會講其實林熙蕾就係佢『神探』心中既鬼，我又覺得唔係。林熙蕾可以話係佢既幻覺而已，但絕對唔係【鬼】。究竟『神探』心中有無【鬼】呢？定係我地所見既其實就係佢隻【鬼】呢？

片中通過『神探』只見到人地既【鬼】呢種演繹，我覺得其實係講緊人類自大既性格。日常生活中人們往往只會見到別人既不是，但對於自己既錯失又唔會去承認。故事中『神探』亦都係因為有呢種所謂見鬼既能力【自大】，而最後招至慘淡收場。

其實我地片中見到既『神探』其實只不過係佢自己既【鬼】，反而林熙蕾呢個【幻覺】可能先係『神探』自己既真身。

基本上『神探』唔講得上話好睇，不過拍得幾得意。