929

隻 game之前都想玩，不過美版賣得實在太貴。經朋友幫手行版終於前幾日入手，價錢都算合理。其實 Assassin’s Creed 對於各大遊戲平台黎講都係近期既大作，故此係外國各個 game 評網站如 gamespot 等都得到唔少分數。連呢期紅到爆既美劇 heroes 一班演員都有幫手宣傳就知啦！

而其中 heroes season2 女演員 Kristen Bell 都有份參與 Assassin’s Creed 制作。

講番隻 game，第一次開 game load左好耐(應該係 install 緊所以咁耐)。好啦，等到正式開始玩發覺點解無字幕？已經係 option 搵左好耐都搵唔到，隻 game 後面明明有寫話有英文字幕！(其實有無人做盒既qc？上次容祖兒事件已經係咁，家下又印錯？) 好在d英文都ok聽到啦，因為其實我覺得隻game個故事都應該幾有趣所以想知得清楚d。不過有d情況例如偷聽等等就真係有d困難，尤其係屋企有人睇緊電視就更難聽到。

一開始例牌又係 tutorial，操作ok唔算難。雖然我之前上網見到一d比較話三紅機畫面好過ps3，但我覺得畫面黎講ps3 算係幾靚。無論係個城定係d市民，以致d盔甲都做得好仔細。玩左唔係好耐都 feel 到自由度都應該幾大，不過有無『上古捲軸4』咁大就未知。有d細節例如要穿過一群人果時可以按住某個制去減少同佢地既磨擦，繼而減低自己既『注視度』。另外亦可以好似波斯皇子咁爬上高樓大廈到 scan 個 area，之後再 Bungee jumping 咁跳番落黎。戰鬥果 part 就因為唔係玩左好耐所以招式都未係好多。

不過隻game都有幾多做得唔好既地方。玩緊果時畫面表現唔夠順暢，有d “窒”。另外，間唔中仲會有bug同『hang機』情況出現。出post時其實見到網上都有d bug fix推出左不過好似唔同region推出時間就唔同(希望香港區都可以快d有啦)。另外，雖然唔係玩左好耐都發現電腦既 ai 反應真係唔多掂尤其係暗殺果時。而暗殺果 part 感覺上都無 Splinter Cell 系列出得咁好。舉個例子 Splinter Cell 要殺人時起碼都會射爆d燈先，利用黑暗環境作掩飾先再行動。但 Assassin’s Creed 就可以日光日白大模廝樣咁殺人，大大減少其真實程度。

因為無字幕既關係，相信唔少朋友為左了解個故事都會去買攻略。無奈好多網友都對坊間某本大牌子攻略都給予劣評。其實網上都可以搵到好多好詳細既攻略，例如以下呢個網站我就覺得好好。起碼真係真正既小說式攻略。

Assassin’s Creed劇情攻略

雖然網內既攻略係 3紅機版本，但因為基本上3紅機同ps3版都無咩分別所以都無所謂。